İlham Mustafa, Sputnik Azərbaycan
BAKI, 30 may — Sputnik. "Ümid edək ki, tezliklə şairi sevənlər Mehrili kəndinə gələndə onun yurd yerində Əhməd Cavad adı ilə bağlı heç olmasa bir tikili, yazı lövhəsi və ya bir abidə görəcəklər".
İki il əvvəl Sputnik Azərbaycan-ın İstiqlal şairi Əhməd Cavadın ata-baba yurdundan hazırladığı yazı bu sözlərlə bitirdi. Lakin üzərindən iki il keçməsinə baxmayaraq, burada yaxşılığa doğru heç nə dəyişməyib. Əksinə bütün bölgədə himnimizin müəllifinin ata-baba yurdu kimi tanınan ərazidə tikilən ev daha da bərbad vəziyyətə düşərək bir hissəsi uçub. Belə davam edəcəyi təqdirdə şairin ata-baba yurdundan da heç bir əsər-əlamət qalmayacaq.
Azərbaycan himninin müəllifi Əhməd Cavad indiki Şəmkir rayonunun Mehrli bələdiyyəsində anadan olub. Hazırda onun ata-baba yurdu hesab edilən ərazidə köhnə, qəzalı vəziyyətdə olan və heç kimin yaşamadığı bir ev var. Bir çoxları buranı şairin doğulduğu ev kimi təqdim edirlər. Lakin sakinlər sadəcə bu evin yerləşdiyi həyətdə bir vaxtlar onun evi olduğunu bildiriblər. O, repressiya qurbanı olduqdan sonra yaşadığı ev dağıdılıb. Bu haqda Sputnik Azərbaycan-ın bölgə müxbirinə kənd sakini Sabir Əliyev danışıb:
"Repressiya qurbanı olduqdan sonra şairin evinə heç kim yaxın düşə bilmədi. Baxımsız qalan ərazi ötən əsrin 50-ci illərində Qəmbər adlı kənd sakininə ev yeri kimi verilib və hazırda da həmin kişinin övladlarının mülkiyyəti sayılır. Uzun müddətdir onlar burada yaşamadığından, ev uçub-dağılıb, qəzalı vəziyyətə düşüb".
Sənədlərdə ərazinin başqa adama məxsusluğu deyilsə də, himnimizin müəllifinin dogma kəndində adını daşıyan yazı, barelyef və ya büstü hələ də yoxdur.
