BAKI, 5 may — Sputnik. Xəbər verildiyi kimi, Türkiyədə koronavirusla mübarizə tədbirləri çərçivəsində Ramazan ayının sonuna kimi sərt karantin tədbirləri həyata keçirilir. Tam qapanmaya gedən Türkiyədə hətta ərzaq və bir sıra gündəlik tələbat mallarından başqa, digər məhsulların satışı da qadağan olunub.
Bu durumda əhalini bir məsələ narahat edir: Ramazanın sonunda verməli olduqları fitrə zəkatını ehtiyacı olan insanlara necə çatdıracaqlar?
Türkiyə Dini İşlər İdarəsinin Din İşləri üzrə Ali İdarəetmə Heyətinin üzvü İdris Bozkurt məsələyə aydınlıq gətirib. O bildirib ki, fitrə ehtiyacı olan insanlara internet vasitəsilə də çatdırıla bilər.
"COVID-19 səbəbindən ən yaxın qohumlarımızı belə görə bilmirik. Başqa sözlə, bu günlərdə ehtiyacı olan insanlarla birbaşa əlaqə yaratmaq daha çətindir. Odur ki həmin adamlara zəng vurub bank hesab nömrələrini almaq olar . Mobil və ya internet bankçılığı vasitəsilə onların hesabına fitrə məbləğini köçürə bilərsiniz", – deyə o bildirib.
Bozkurt onu da qeyd edib ki, fitrənin məbləği kasıb insanın gündəlik qidasının dəyərində olmalıdır: "Fitrə kasıb, möhtac insanlara ödənilir. Ancaq birinci dərəcəli qohumlara verilə bilməz, çünki biz onsuz da onlara kömək etməliyik. Bizim mal-dövlətimiz həm də onların mal-dövləti sayılır. Başqa sözlə, zəkatımızı, fitrəmizi onlara ödəyə bilmərik".
