BAKI, 30 aprel — Sputnik. 2021-ci ildə Azərbaycanda inflyasiyanın səviyyəsi hədəf diapazonunda formalaşacaq.
Sputnik Azərbaycan xəbər verir ki, bu barədə Mərkəzi Bankın sədri Elman Rüstəmov aprelin 30-da faiz dəhlizinin parametrləri ilə bağlı keçirdiyi mətbuat konfransında deyib.
E.Rüstəmov qeyd edib ki, ilin birinci rübündə orta illik inflyasiya 2,2 faiz olub. Martda isə illik inflyasiya 4,1 faiz təşkil edib və inflyasiyanı hədəf diapazonundan kənarlaşdıra biləcək amillər müşahidə edilmir.
O həmçinin bildirib ki, Dövlət Neft Fondu bu il valyuta satışlarını azaldıb və 140 mln. ABŞ dollarına qənaət edib: "Valyuta bazarında profisit var və tam tarazlıq hökm sürür".
Qeyd edək ki, bu ilin I rübündə Neft Fondu valyuta hərraclarında 1,480 mlrd. dollar məbləğində vəsait satıb. Bu da 2020-ci ilin ötən dövrü ilə müqayisədə 46,6% azdır.
