BAKI, 14 aprel - Sputnik. Onlarla milyard dollarlıq fırıldağa görə 150 il həbs cəzasına məhkum edilmiş Bernard Medoff ABŞ-da həbsxanada vəfat edib.
Sputnik Azərbaycan-ın məlumatına görə, "əsrin fırıldaqçısı", "əsrin piramidasının qurucusu" adlandırılan Medoff NASDAQ fond birjasının direktorlar şurasının sədri olub.
JUST IN: Bernard Madoff, the mastermind behind a $20 billion Ponzi scheme whose name became synonymous with financial fraud, has died in federal prison. https://t.co/rRbfmlSjpX
— CNN (@CNN) April 14, 2021
1960-cı ildə Medoff Uoll-Stritdə «Bernard L. Madoff Investment Securities LLC» firmasını təsis edərək 2008-ci il dekabrın 11-dək ona rəhbərlik edib. Həmin vaxt o, dünya tarixində ən iri maliyyə piramidasını qurmaqda ittiham edilib. Bildirilir ki, biznesmenin maliyyə fırıldağından 3 milyonadək insan zərər görüb. Maliyyə itkiləri 17,5 milyard dollar olub. 2009-cu il iyunun 29-da Bernard Medoff Nyu-York məhkəməsinin hökmü ilə 150 il həbs cəzasına məhkum edilib.
Medoff haqqında Hollivud da film çəkib: 2017-ci ildə ekranlara çıxan "Yalançı, Möhtəşəm və Dəhşətli" filmində fırıldaqçının rolunu Robert de Niro canlandırıb.
