BAKI, 4 aprel - Sputnik. Daxili bazar üzrə komissar Tyerri Breton bəyan edib ki, Avropa İttifaqı sentyabrdan etibarən ayda 200 milyon doza koronavirus əleyhinə vaksin istehsal edə biləcək.
Sputnik Azərbaycan bildirir ki, bu barədə Le Parisien yazır.
O xatırladıb ki, yanvarda Aİ 14 milyon, fevralda 28 milyon, martda isə 60 milyon doza vaksin istehsal edib. Növbəti rübdə Brüssel 100 milyon doza göstəricini hədəfləyib.
"Yayda göstərici 120 milyona bərabər olacaq, sentyabrdan isə 200 milyon doza istehsalına başlayacağıq", - Breton deyib.
Avrokomissar bildirib ki, ikinci yarımildə Avropa İttifaqında 800 milyon doza preparat olacaq.
Son məlumatlara görə, Avropada 40 milyon insan COVID-19-a yoluxub, 28 milyon sağalıb, 925 min nəfər həyatını itirib.
