Eldar Tanrıverdiyev, Sputnik Azərbaycan
BAKI, 30 mart — Sputnik. ABŞ-ın nüfuzlu "The National Interest" nəşrində İkinci Qarabağ müharibəsinin nəticələri, Ermənistanın minalanmış ərazilərin xəritələrini Azərbaycana verməməsi ilə bağlı məqalə dərc olunub.
Sputnik Azərbaycan xəbər verir ki, Beynəlxalq Münasibətlərin Təhlili Mərkəzinin (BMTM) aparıcı məsləhətçisi Şahmar Hacıyevin müəllifi olduğu "Minalar və əsirlər Qarabağda sülh prosesinə mane olur" adlı məqalədə qeyd olunub ki, Ermənistanla Azərbaycan arasındakı İkinci Qarabağ müharibəsi on illərdir davam edən münaqişədə status-kvonu dəyişib.
Yazıda vurğulanıb ki, tərəflər arasında müsbət dinamikaya baxmayaraq, noyabr sazişinin bütün bəndlərinin həyata keçirilməsində hələ də çətinliklər mövcuddur: "Belə ki, Ermənistan Silahlı Qüvvələrinin və silahlarının Laçın dəhlizi ilə Qarabağa tranziti, eləcə də Ermənistan Silahlı Qüvvələrinin Azərbaycan ərazilərindən tam çıxarılmaması narahatlıq doğuran məqamlardır".
Ş.Hacıyev qeyd edib ki, bundan əlavə, Ermənistan və Azərbaycanın bu günə qədər həll edə bilmədikləri iki əsas məsələ qalır:
"Birincisi, Azərbaycan hərbi qüvvələrinin dekabrın ortalarında, sülh müqaviləsi imzalandıqdan bir ay sonra ələ keçirdiyi 62 erməni əsgərinin statusu həll olunmamış qalır. Bu əsgərlər barışıq sazişini qəbul etməkdən imtina edərək, Azərbaycan ordusuna qarşı hərbi əməliyyatları davam etdiriblər. Nəticədə Azərbaycanın üç hərbçisi və bir mülki şəxsi şəhid olub. Bu baxımdan, Bakı bu əsgərləri terrorizmdə günahlandırır və Ermənistana qaytarılan əsirlərdən fərqli olaraq onları geri qaytarmaqdan imtina edir".
Müəllif bildirib ki, digər əsas məsələ Ermənistanın minalanmış ərazilərin xəritələrini Azərbaycana verməməsidir.
Ş.Hacıyev vurğulayıb ki, Ermənistan barışıq niyyətinin göstəricisi olaraq Azərbaycana və sülhməramlılara mina xəritələri verməlidir: "Bu cür fəaliyyət minalardan təmizlənmə əməliyyatlarını sürətləndirəcək və tərəflər arasında qarşılıqlı inamı artıracaq".
