Xalid Məmmədov, Sputnik Azərbaycan
BAKI, 11 fevral — Sputnik. "Bu ilin yanvarın 1-dən müvvəqqəti vergi rejimi ilə bağlı tətbiq edilən bütün güzəştlər ləğv edilib".
Sputnik Azərbaycan xəbər verir ki, bunu İqtisadi Tədqiqatlar və Tədris Mərkəzinin rəhbəri Radil Fətullayev Sputnik Azərbaycan-ın Multimedia Mətbuat Mərkəzində vergi güzəştləri və digər məsələlər ilə bağlı keçirdiyi mətbuat konfransında deyib.
O bildirib ki, koronavirus pandemiyasının yayılması nəticəsində iqtisadi şəraitin əhəmiyyətli şəkildə dəyişməsi ilə əlaqədar tətbiq edilən müvəqqəti vergi rejiminin müddəaları 2020-ci il yanvarın 1-dən bir il müddətinə tətbiq edilib:
"Məsələn, müvəqqəti vergi rejimində bütün ölkə üzrə sadələşdirilmiş vergi ödəyiciləri dövriyyədən 2 faiz deyil, 1 faiz vergi ödəyirdilər. Artıq bu ilin yanvar ayından yenidən bu göstərici 2 faiz olub. Bundan başqa, müvəqqəti vergi rejimində xidmət sektorunda fəaliyyət göstərən fərdi sahibkarlar məcburi dövlət sosial sığorta haqqı üzrə 62.50 manat əvəzinə 37.50 manat, tikinti və ticarət sektorunda fəaliyyət göstərənlər 125 manat əvəzinə 62.50 manat ödəyirdilər. Artıq tətbiq edilən güzəştlər ləğv edilib. Onlar əvvəlki qaydada ödəniş etməlidirlər".
