Zülfiyyə Quluyeva, Sputnik Azərbaycan
BAKI, 6 fevral — Sputnik. Azərbaycanın işğaldan azad olunmuş ərazilərində 10 seysmik stansiya quraşdırılacaq. Bu barədə Sputnik Azərbaycan-a açıqlamasında Respublika Seysmoloji Xidmət Mərkəzinin (RSXM) baş direktoru Qurban Yetirmişli məlumat verib.
O bildirib ki, 3 stansiya əvvəlki yerlərində quraşdırılacaq. Yerdə qalanı isə digər yerlərdə qoyulacaq: "Bizim işğaldan azad olunmuş ərazilərdə quraşdıracağımız stansiyalar artıq hazırdır. Qalıb həmin ərazilərdə binaların tikinti məsələsi. Eləcə də o stansiyalar üçün pavliyonların hazırlanması. Bunun üçün biz müəyyən müddət gözləməli oluruq. Çünki işğalçı dövlətin ordusu o torpaqları minalayıb. Həmin ərazilər minadan təmizlənib, təhlükəsizlik təmin edilməlidir ki, orada tikinti və quraşdırma işlərinə başlayaq. Yəqin ki, bu ilin ikinci yarısına biz o ərazilərdə seysmik stansiyaların quraşdırılması, binaların inşası ilə bağlı işlərə başlaya biləcəyik".
