Rahim Məmmədov, Sputnik Azərbaycan
BAKI, 3 fevral — Sputnik. 27 yaşlı Məhəmməd Məmmədli Vətən müharibəsində Suqovuşan uğrunda gedən döyüşlərdə şəhid olub. Yaxınları ilə söhbətində şəhidlik zirvəsinə ucalmağı, bu zirvənin hər kəsə nəsib olmadığını deyirmiş. Yenicə dünyaya gələn körpə qızcığaz atasının ən böyük zirvəyə, şəhidliyə yüksəlməsindən xəbərsizdir. Böyüyəndə atası ilə qürur duyub, fəxr edəcək.
Sputnik Azərbaycan xəbər verir ki, Mingəçevir Mərkəzi Xəstəxanasının doğum evində dünyaya göz açan Fatimə Məmmədli şəhid Məhəmmədin ilk övladıdır. Həyat yoldaşı Aytac Məmmədli yenicə dünyaya gələn övladına atasının istəyinə uyğun olaraq Fatimə adını verdiyini deyir:
"Özünün arzusuydu, adını da Fatimə qoymuşdu. Kaş özü də görərdi. Ruhu şad olsun! Şəhidlik onun ən böyük arzusuydu. Həmişə deyirdi, şəhidlik böyük zirvədir, o, hər adama qismət olmur”.
Dörd gün öncə Mingəçevir şəhər Xəstəxanasının doğum evində dünyaya gələn şəhid övladı Fatimə Məmmədli və anası Aytac Məmmədlinin vəziyyətləri normaldır. Bu haqda Mingəçevir Doğum evinin müdiri Rahilə İbadullayeva Sputnik Azərbaycan-ın bölgə müxbiri ilə söhbətində bildirib: "Bu il yanvar ayının 30-da əziz şəhidimiz Məhəmmədin ilk övladı qeysəriyyə kəsiyi ilə dünyaya gəlib. 3 kilo 500 qram sağlam durumda qız uşağıdır. Hazırda vəziyyəti kafidir. Ananın da, uşağın da vəziyyəti normalıdır”.
Şəhidin yeni doğulmuş körpəsi Mingəçevir doğum evindən öz evinə böyük coşqu ilə yola salınıb.
