Erməni tərəfinin Azərbaycan ərazilərini 30 ilə yaxın işğal altında saxlaması qanunsuz hərbi birləşmələrin nəzarəti altında olan bütün bölgələrin acınacaqlı vəziyyətə düşməsinə gətirib çıxarıb. Mülki və təsərrüfat obyektləri ilə yanaşı, Azərbaycanın misilsiz mədəniyyət abidələri də məhv edilib.
Vətən Müharibəsi başa çatandan sonra rəsmi Bakı dəymiş iqtisadi ziyanın qiymətləndirilməsi prosesinə başlayıb və ilkin məlumatlara görə, bu rəqəm çox böyük ola bilər. Məhv edilmiş tarixi, dini və mədəni abidələrin dəyərini isə ümumiyyətlə, pulla ölçmək qeyri-mümkündür.
İşğal dövründə Azərbaycanın yüzlərlə abidəsi məhv edilib və ya yararsız hala salınıb ki, onların arasında 13 beynəlxalq əhəmiyyətli mədəniyyət nümunəsi də var. İşğal olunmuş ərazilərdə yerləşən məscidlərin əksəriyyəti yerlə yeksan edilib: 67 dini obyektdən 64-ü tamamilə dağıdılıb. Bu barədə Sputnik Azərbaycan-ın xüsusi infoqrafikasından daha ətraflı məlumat əldə etmək mümkündür.
