BAKI, 13 yanvar - Sputnik. Azərbaycanın məşhur futbol hakimi Tofiq Bəhramovun Respublika stadionundakı heykəli ilə bağlı problem aradan qaldırılır.
Bu barədə Sputnik Azərbaycan-a Azərbaycan Gənclər və İdman Nazirliyinin Mətbuat katibi Səmayə Məmmədova məlumat verib.
Onun sözlərinə görə, heykəlin rəngini yeniləmək üçün üzü cilalanıb:
"Əslində buna problem demək olmaz. Bilirsiniz ki, Nazirliyin mərkəzi arenada reabilitasiya mərkəzi var. Orada təmir işləri gedirdi. Heykəlin rəngi köhnəldiyindən, üz qabığında çatlar əmələ gəlmişdi. Yenidən rəngləmək üçün sadəcə üzü cilalanmışdı. Bu, işləri təhvil verəndə heykəlin də təmiz olması üçün edilmişdi. Bu gündən işlərə başlanılıb. 1-2 günə yekunlaşacaq".
Tofiq Bəhramovun adını daşıyan nəvəsi babasının heykəlinin rənginin ağardılması ilə bağlı AFFA -ya müraciət edərək onun əvvəlki vəziyyətə qaytarılmasını xahiş edib.
Tofiq Bəhramovun heykəli 2004-cü ilin oktyabrın 13-də adını daşıdığı stadionun qarşısında, 2006-cı il dünya çempionatının seçmə mərhələsinin Azərbaycan - İngiltərə görüşündən əvvəl açılıb.
Bir qədər əvvəl Tofiq Bəhramovun nəvəsi babasının heykəlinin ağardıldığını bildirib və onun şəklini paylaşıb. Heykəlin bu hala salınması sosial şəbəkə istifadəçiləri tərəfindən kəskin tənqid atəşinə tutulub.
