BAKI, 31 dekabr - Sputnik. Çin COVID-19 infeksiyasının mənşəyi barədə məlumatları gizlətməyə çalışır.
Sputnik Azərbaycan bildirir ki, bunu Associated Press agentliyi yazır.
Müəlliflər yazırlar ki, onların məlumatına görə, hazırda virus daşıyıcıları olan yarasaların yaşadığı Yunnan əyalətindəki mağaralar Çin hökumətinin ciddi nəzarəti altındadır. Jurnalistlər həmçinin bildirirlər ki, dövlət təhlükəsizlik xidmətinin agentləri jurnalistlər mağaraların yanında olarkən onları izləyirmişlər.
AP güman edir ki, Çində virus barədə araşdırmalar dərc olunmazdan öncə onları xüsusi komissiya yoxlayır, rəsmi Pekin isə SARS-CoV-2-nin öyrənilməsi üçün alimlərə böyük miqdarda qrantlar ayırır.
Müəlliflər sənədlərə istinadən bildirirlər ki, araşdırmalar aparan heyətin üçüncü şəxslərə koronavirusla bağlı məlumat, yaxud nümunə ötürmək hüququ yoxdur. Nəşr həmçinin Çin hökumətini araşdırmalarla bağlı ayrı-seçkilik etməkdə də günahlandırır, yəni müəlliflərin sözlərinə görə, yarasalarla bağlı tədqiqat aparan, ancaq bununla dövlət xətti ilə məşğul olmayan bir qrup mütəxəssisin nümunələri müsadirə olunub. Çinin Xarici İşlər Nazirliyindən AP-nin sorğusuna cavab olaraq bildiriblər ki, koronavirusu bir çox ölkədə aşkarlayıblar, problemin həlli ilə də "qlobal səviyyədə" məşğul olmaq lazımdır.
XİN-in rəsmi nümayəndəsi Xua Çunyin isə hələ aprel ayında bildirmişdi ki, Çin lap əvvəldən koronavirus infeksiyası ilə bağlı mətbuatda yayılan xəbərlərə münasibətdə açıq və məsuliyyətli mövqe tutub.
