BAKI, 17 dekabr — Sputnik. Türkiyənin milli müdafiə naziri Hulusi Akar və xarici işlər naziri Mövlud Çavuşoğlu Ukraynaya səfər edəcəklər. Sputnik Azərbaycan TRT Haber-ə istinadla məlumat verir ki, rəsmi görüşlərdə əsasən sənaye layihələri müzakirə oluncaq.
Türkiyənin Xarici İşlər Nazirliyindən verilən məlumata görə, Ukraynada 9-cu Yüksək Səviyyəli Strateji Şura toplantısına hazırlıq aparılacaq və Türkiyə-Ukrayna xarici işlər və müdafiə nazirlərinin iştirakı ilə "2+2" formatında xüsusi iclas keçiriləcək.
"Milli müdafiə naziri Hulusi Akar və xarici işlər naziri Mövlud Çavuşoğlu iclasa qatılmaq üçün 17-18 dekabr tarixlərində Ukraynada rəsmi səfərdə olacaqlar", - deyə nazirliyin məlumatında bildirilir.
Bundan başqa, Çavuşoğlunun Ukraynada Krım tatarları, qaqauzlar, axısqa türkləri kimi türk mənşəli etnik millətlərin nümayəndələri ilə görüşü də nəzərdə tutulub.
