BAKI, 9 dekabr — Sputnik. "Hazırda Azərbaycanın bank sektorunda 7,4 milyard manat əmanət var, bunun isə 6,4 milyard manatı qorunur".
Sputnik Azərbaycan xəbər verir ki, bunu Mərkəzi Bankın sədri Elman Rüstəmov deyib.
"Gələn il mart ayında banklara əmanət qoyuluşuna dair bir sıra yeniliklərlə çıxış edəcəyik", - o qeyd edib.
Baş bankir deyib ki, koronavirus pandemiyasına və Vətən müharibəsinə baxmayaraq maliyyə sistemi bu ili yaxşı göstəricilərlə başa vuracaq: "Bu gün dövlətimizin qarşısında duran çox ciddi çağırışlar var".
O bildirib ki, şəhid ailələri və qazilərlə bağlı məsələ bütün cəmiyyətin, Prezident İlham Əliyevin və Birinci vitse-prezident Mehriban Əliyevanın diqqətindədir: "Şəhidlər və qazilər bizim qəhrəmanlarımızdır. Onlarla bağlı ciddi işlər görürük. O cümlədən maliyyə sektorunda bu işlər görülür. Özləri ilə görüşərək lazımi məsələləri həll edəcəyik".
