BAKI, 28 sentyabr — Sputnik. Türkiyənin Ermənistanla olan münaqişəyə müdaxiləsindən söhbət belə gedə bilməz. Sputnik Azərbaycan RİA Novosti-yə istinadən xəbər verir ki, bunu Azərbaycanın Xarici İşlər naziri Ceyhun Bayramov bildirib.
"Türkiyənin heç bir müdaxiləsi yoxdur. Əgər biz Türkiyə və Azərbaycan arasında hərbi-texniki əməkdaşlıqdan danışırıqsa, onda Azərbaycan bir sıra ölkələrlə hərbi-texniki sahədə əməkdaşlıq edir və hətta bu sahədə Rusiya ilə daha çox əməkdaşlıq edir", - deyə Ceyhun Bayramov qeyd edib.
O, vurğulayıb ki, əgər Azərbaycan Silahlı Qüvvələrinin bu gün istifadə etdiyi silahlar nəzərdən keçirilsə, onda onun əksəriyyətinin Rusiya istehsalı olduğu görünər.
Ceyhun Bayramov qeyd edib ki, Türkiyə ilə müntəzəm birgə təlimlər planlı xarakter daşıyır və hər hansı bir konkret ölkəyə qarşı yönəlməyib: "Türkiyə ilə hərbi təlimlərə gəldikdə, onlar tamamilə planlı xarakter daşıyır. Ötən il Azərbaycanda ondan çox belə təlim keçirilib. Onların əsas məqsədi döyüş hazırlığını qaldırmaqdır".
