Nigar İsgəndərova, Sputnik Azərbaycan
BAKI, 17 sentyabr — Sputnik. Yeni tədris mövsümünün başlanması valideynlər tərəfindən narahatlıqla qarşılanır. Bir çox valideynlər övladının məktəb girişində hərarətinin xüsusi aparatla yoxlanmasının əleyhinədir. Onlar belə hesab edir ki, hər gün təkrarlanan bu proses uşaqların səhhəti üçün ciddi təhlükədir. Onlar belə zənn edir ki, bu aparat vasitəsi ilə uşaqlara şüa keçirilir ki, bu da onların səhhətinə mənfi təsir edir.
Bəs, həqiqətən də bu aparatlar azyaşlılar üçün təhlükə mənbəyi hesab edilə bilərmi?
Baş pediatr Nəsib Quliyev Sputnik Azərbaycan-a açıqlamasında bu haqda danışaraq valideyn narahatlığına son qoyub: "Xəstələnmə əlamətlərindən biri hərarətin yüksəlməsi olduğundan məktəbin girişində hərarət yoxlanılır. Alına toxunmaqla, yaxud da cibdə termometr gəzdirmək düzgün deyil".
N.Quliyev deyir ki, bu "infrared" adlanan termometrlər bədənlə təmas qurmur: "Bu termometrlər məsafədən hərarəti göstərdiyi üçün heç bir narahatlığı, təhlükəsi yoxdur. Valideynlərin narahatlığına heç bir əsas yoxdur".
Azərbaycan Tibb Universitetinin dosenti Ədalət Rüstəm də bu termometrlərin zərərsiz olduğunu deyir: "Bu cihazlar elektromaqnit dalğaları ilə hərarəti göstərir. Onun təhlükəli olması haqda deyilənlər şayiədir. Bu cihazların insan orqanizminə mənfi, müsbət təsiri belə yoxdur".
