BAKI, 12 sentyabr — Sputnik. Baş nazir Binyamin Netanyahu və ailəsi üçün Vaşinqtona gedən xüsusi reys şirkət sahibinin rəddinə görə ləğv edilib.
Sputnik Azərbaycan xarici mətbuata istinadla xəbər verir ki, məlumata görə, təyyarənin sahibi iş adamı Udi Angelin idarəetmə şirkəti müqaviləyə qarşı çıxıb. Şəxsi təyyarədə uçuş ən azı 600,000 şekelə (145,000 dollara) başa gələcək.
Baş nazirlik ofisi isə "medianın BƏƏ və digər ərəb ölkələri ilə tarixi sülh sazişindən ictimaiyyətin diqqətini yayındırmasının qarşısını almaq üçün xüsusi reys ləğv edildi" deyə məlumat verib.
Netanyahu bazar günü axşam Tel-Əvivdən yola düşən rəsmi İsrail nümayəndə heyətinə qatılacaq. Həyat yoldaşı Sara və iki oğlu Avner və Yairin səfərdə Baş Nazirə qatılması gözlənilir.
