BAKI, 9 sentyabr — Sputnik. Milli Məclisin Əmək və sosial siyasət komitəsinin iclası keçirilir. İclasın gündəliyinə 9 məsələ daxil edilib.
Sputnik Azərbaycan-ın məlumatına görə, tədbirdə 2020-ci il yaz və növbədənkənar sessiyaları ərzində Əmək və sosial siyasət komitəsində görülən işlər barədə hesabat təqdim ediləcək, komitənin 2020-ci il payız sessiyası üçün işlər planına baxılacaq.
Komitə üzvləri "Təhsil haqqında", "Valideynlərini itirmiş və valideyn himayəsindən məhrum olmuş uşaqların sosial müdafiəsi haqqında", "Sosial müavinətlər haqqında", "Sahibkarlıq fəaliyyəti haqqında", "Dövlət qulluğu haqqında", "İşsizlikdən sığorta haqqında" və "Azərbaycan Respublikasının 2020-ci il dövlət büdcəsi haqqında" qanunlarda dəyişikliklərə baxacaqlar.
Eyni zamanda Vergi, Əmək, Cinayət, İnzibati Xətalar məcəllələrində və "Uşaq hüquqları haqqında", "Sağlamlıq imkanlarında məhdud şəxslərin təhsili (xüsusi təhsil) haqqında", "Hüquqi şəxslərin dövlət qeydiyyatı və dövlət reyestri haqqında", "Məktəbəqədər təhsil haqqında", "Peşə təhsili haqqında", "Əlilliyi olan şəxslərin hüquqları haqqında" və "Ümumi təhsil haqqında" qanunlarda dəyişikliklər müzakirə ediləcək.
Komitə sədri Musa Quliyev deyib ki, komitənin 2020-ci il payız sessiyası üçün işlər planına iki məsələ daxil edilib: "Bunlar "Turizm haqqında" və "Xeyriyyəçilik fəaliyyəti haqqında" qanun layihələridir. Sessiya dövründə bir sıra qanunlara da əlavə və dəyişikliklərin ediləcək".
