BAKI, 16 avqust — Sputnik. ABŞ Prezidenti Donald Tramp çox bəyəndiyi Fox News telekanalının CNN-dən betər olduğunu deyib.
"Fox News-a istirahət günləri gündüzlər baxmaq mümkün deyil. O, hətta feyk xəbərlər kanalı CNN-dən də betər olub. Sizə OANN-a (One America News Network - ifrat sağçı nüfuza malik telekanal - red.) keçməyi tövsiyə edirəm. Onlar gerçəkdən də öz işlərini "vicdanla və balanslı şəkildə" yerinə yetirirlər", - Tramp Twitter səhifəsində yazıb.
.@FoxNews is not watchable during weekend afternoons. It is worse than Fake News @CNN. I strongly suggest turning your dial to @OANN. They do a really “Fair & Balanced” job!
— Donald J. Trump (@realDonaldTrump) August 16, 2020
ABŞ Prezidenti narazılığının səbəbini açıqlamayıb. Eyni zamanda məhz elə bu gün səhər Tramp telefonla Fox News-un efirinə qoşularaq müsahibə verib. ABŞ lideri bu telekanalın müxbirlərilə daha çox ünsiyyət saxlayır və elə ən çox müsahibəni də onlara verir. Fox News adətən Trampı dəstəkləsə də hərdən onun xeyrinə olmayan sorğuları işıqlandırmaqla Prezidentin tənqidinə tuş gəlir.
CNN isə qəti anti-Tramp mövqeyi ilə seçilir.
