“Vaxtından əvvəl parlament seçkisi keçirsək, böhranı aşarıq”

BAKI, 8 avqust — Sputnik. Livandakı hazırkı böhrandan yalnız ölkədə vaxtından əvvəl parlament seçkisi keçirilərsə, çıxmaq olar.

Sputnik Azərbaycan RİA Novosti-yə istinadən bildirir ki, bunu ölkənin Baş naziri Hassan Diab deyib.

Diabın ölkə vətəndaşlarına müraciətini Al-Mayadeen telekanalı yayımlayıb.

Diab əlavə edib ki, nazirlərin növbəti iclasında növbədənkənar parlament seçkisinin keçirilməsinin layihəsini irəli sürəcək. 

Avqustun 4-də Beyrut limanında baş verən partlayış barədə danışan Baş nazir deyib ki, o, korrupsiya nəticəsində baş verib.

​Bu gün etiraz edənlər parlament qarşısında korrupsiyaya yol verən məmurları asmaq üçün dar ağacları da qurublar.   

​Bundan öncə Livanın Prezidenti Mişel Aun demişdi ki, partlayışın bütün səbəbləri, o cümlədən xarici müdaxilə də araşdırılacaq.

​Qeyd edək ki, bu gün yerli vaxtla saat 16-da minlərlə insan hökumətin dəyişməsi və islahatlar tələbilə mitinqə çıxıb və aksiya dərhal iğtişaşa çevrilib. İnsanlar polisə daş atıblar, onlar isə gözyaşardıcı qazdan istifadə edərək kütləni dağıtmaq istəyiblər.

​Etirazçılar öncə Livan XİN-in, sonra enerji, maliyyə və ətraf mühit nazirliklərinin binalarına giriblər. Kütləni dağıtmaq üçün polislərin köməyinə gələn hərbçilər güllədən istifadə ediblər.

​İğtişaşlarda 230-dan çox adam yaralanıb. Bir polis nəfəri isə həlak olub. Livanın MTV telekanalının məlumatına görə, o, Le Grey otelinə hücum zamanı ölüb.