BAKI, 27 iyul — Sputnik. “Baku Caspian Hospital” ASC ləğv olunduğunu elan edib.
Sputnik Azərbaycan bu barədə İqtisadiyyat Nazirliyi yanında Dövlət Vergi Xidmətinin “Vergilər” qəzetinə istinadən xəbər verir.
Məlumata görə, keditorlar iki ay ərzində tələblərini Bakı şəhəri, Yasamal rayonu, Əbdürrəhim bəy Haqverdiyev küçəsi, 78 ünvanına bildirə bilərlər.
Xatırladaq ki, “Baku Caspian Hospital” 2017-ci ildə vaxtilə “Azərbaycan Xəzər Dəniz Gəmiçiliyi” QSC-nin balansında olmuş, sonradan isə İqtisadiyyat Nazirliyi yanında Əmlak Məsələləri Dövlət Xidmətinə (keçmiş Əmlak Məsələləri Dövlət Komitəsi) təhvil verilmiş “Mərkəzi Dənizçilər Xəstəxanası”nın idarə edilməsi məqsədi ilə yaradılıb.
Səhmdar cəmiyyətinin baş direktoru Qerasim Rüstəmov “Report”a açıqlamasında rəhbərlik etdiyi kommersiya qurumunun ləğv olunmasını xəstəxananın Dövlət Gömrük Komitəsinin balansına verilməsi ilə izah edib: “Bundan sonra Komitənin 2 tibb müəssisəsi olacaq. Bunlardan biri Mərkəzi Gömrük Hospitalıdır ki, hazırda tamamilə koronavirus xəstələrinin müalicəsi üçün ayrılıb. Mənim rəhbərlik etdiyim və artıq “Dövlət Gömrük Komitəsinin xəstəxanası” adlanan bu obyektdə isə digər xəstələr müalicə olunacaq. Bununla bağlı Nazirlər Kabinetinin qərarı var”.
