BAKI, 25 iyul — Sputnik. Türkiyədə koronavirus pandemiyası ilə mübarizə çərçivəsində məşğulluğun qorunmasına yönəlmiş qanun layihəsi qəbul edilib.
Sputnik Azərbaycan "Haberler"ə istinadla xəbər verir ki, qanun layihəsi pandemiyanın məşğulluğa təsirlərini azaltmaq məqsədilə hazırlanıb.
Qanuna görə, dövlət başçısı qısaldılmış iş günü icazəsini 31 dekabr 2020-ci ilədək, işdən çıxarma qadağasını isə 30 iyun 2021-ci ilədək uzada bilər.
Başqa sözlə, işçilərlə bağlanan əmək müqavilələrinin ləğv edilməsinin qarşısını almaq üçün tətbiq olunan tənzimləmə Prezidentin qərarı ilə 30 iyun 2021-ci ilə qədər uzadıla bilər.
Prezident qısamüddətli iş icazəsi müddətini 31 dekabr 2020-ci ilədək uzada biləcək. Yəni pandemiya ilə bağlı işçilər iş yerlərində qısamüddətli iş saatı icazəsindən istifadə edə bilərlər. Sonra həmin işçilər tam iş vaxtına qayıtdıqları halda İşsizlikdən Sığorta Fondu tərəfindən dekabrın 31-dək onlara vəsait ödəniləcək.
