BAKI, 25 iyul — Sputnik. Fransanın Səhiyyə naziri Olivye Veran "Pais" nəşrinə müsahibəsində bildirib ki, koronavirus faktları artacağı təqdirdə sərhədlərin təkrarən bağlanacağı istisna deyil.
Sputnik Azərbaycan Rusiya mətbuatına istinadla xəbər verir ki, daha əvvəl Fransa hakimiyyəti vətəndaşlarına epidemioloji vəziyyətin ağırlaşması ilə əlaqədar olaraq İspaniyanın Kataloniya əyalətinə getməməyi tövsiyə etmişdi.
"Öncədən heç nəyi istisna etmək olmaz. Biz bir gündə müəyyən ərazilərlə, xüsusilə də Almaniya ilə sərhədlərimizdə nəzarəti gücləndirdik.
Əsas qarşılıqlı əlaqə prinsiplərinə əməl etmək, dialoqda olmaq, məlumatlar paylaşmaq və ehtiyac olarsa tədbirlərə dair razılığa gəlməkdir" - Veran bildirib.
Veran əlavə edib ki, "sosial, iqtisadi və psixoloji" baxımdan ümumi izolyasiya nəzərdə tutulmur.
