Tovuzun Dondar Quşçu və Ağdam kəndlərinin dörd gündür ki, Ermənistan silahlı qüvvələri tərəfindən aramsız atəşə tutulması nəticəsində yaşayış evlərinə, dinc əhaliyə xeyli ziyan dəyib. Ermənistan tərəfinin atdığı mərmi Dondar Quşçu və Ağdam kəndlərində evlərin tavanını uçurdub, pəncərələrini qırıb, bir neçə mənzili tam yaşayış üçün yararsız hala salıb. Bu kəndlərdə hasarlarda, evlərin divarlarındakı güllə izləri, həyətlərə düşən mərmi qalıqları Ermənistan silahlı qüvvələrinin dinc sakinləri hədəfə almasının silinməz sübutudur. Yaşayış evləri yararsız hala düşsə də, bu kəndlərin sakinləri öz doğma yurdlarını tərk etmir, cəbhə xəttində Ermənistan silahlı qüvvələri ilə üz-üzə mətin dayanıblar.
Sputnik Azərbaycan Ermənistan silahlı qüvvələri tərəfindən Tovuzun Dondar Quşçu və Ağdam kəndlərinin aramsız atəşə tutulması nəticəsində dinc əhaliyə dəyən ziyanı fotolarda təqdim edir.
Qeyd edək ki, iyulun 14-də saat 14 radələrində Ermənistanın silahlı qüvvələri tərəfindən Tovuz rayonu, Ağdam kənd sakini, 1944-cü il təvəllüdlü Əzizov Əziz İzzət oğlunun yaşadığı evə odlu silah mərmisinin atılması səbəbindən sonuncu aldığı çox saylı qəlpə xəsarətləri nəticəsində həlak olub.
