BAKI, 1 iyul — Sputnik, Zarina Orucəliyeva. Şamaxının Göylər kəndində qəfildən yataq ləvazimatları və tibbi qoruma vasitələrindən ibarət “təpə” yaranıb.
Yerli sakin Nəbi Nəbiyevin Sputnik Azərbaycan-a bildirdiyinə görə, naməlum şəxslərin təcili yardım avtomobilindən qəribə zibil boşaltdığını görən kənd adamları xeyli narahat olublar.
Nəbiyevin dediyinə görə, onların kəndində bir nəfər də olsun koronavirusa yoluxan yoxdur.
Sakinlər güman edirlər ki, istifadə olunmuş döşək, əlcək və maskaları yoluxanların müalicə aldıqları xəstəxanadan, ya da mehmanxanadan utilizasiya məqsədilə gətirib atıblar.
Faktla Ekologiya və Təbii Sərvətlər Nazirliyi də maraqlanıb. Hadisə yerinə gedən ekspertlər, doğrudan da kəndin yanında qeyri-adi zibil qalağı aşkarlayıblar.
Araşdırma nəticəsində müəyyən edilib ki, Şamaxı bölgəsində nə koronavirusa yoluxmuş xəstələrin müalicəsi üçün xüsusiləşmiş xəstəxana, nə də karantin oteli var. Hazırda bu məsələ Şamaxı rayon Polis İdarəsinin nəzarətindədir.
Ekoloqlar isə qeyri-qanuni zibilliyin ləğv edilməsi prosesinə nəzarət ediblər.
