BAKI, 27 iyun — Sputnik. ABŞ-ın Demokratlar partiyasını dəstəkləyən fəallar “Tvit zərbəsi” (Defeat by Tweet) adlı kampaniyaya başladıqlarını bildiriblər.
Sputnik Azərbaycan ABC News-a istinadən bildirir ki, təşkilatın niyyəti Donald Trampın yenidən prezident seçilməsinin qarşısını almaqdır.
Ürəyi istəyən hər kəs bundan belə Trampın hər tvitinə görə 1-10 sent məbləğində ianə edə bilər. Bu minvalla aksiya təşkilatçıları bu ilin noyabrındakı seçkiyədək 50-100 milyon dollar yığmağa ümidlidirlər. Onların sözlərinə görə, bununla ölkə liderinin öz hərəkətlərinə görə məsuliyyət hiss eləməyinə nail ola biləcəklər.
Yığılan məbləğ ABŞ-ın qaradərili sakinlərinin başçılıq etdiyi 15 siyasi təşkilatın arasında bərabər qaydada bölünəcək.
Dövlət başçısı hər gün təxminən 30 tvit atır. Bu, ayda təxminən 900 ismarış edir. Buna görə təşkilatçılar adambaşına ay ərzində 45 dollarlıq limit müəyyənləşdiriblər.
Twitter sosial şəbəkəsi bir müddət öncə Trampın etiraz edənlərin “muxtar zonaları” barədə tvitinin insanlara qarşı təcavüz ehtiva etdiyini hesab eləmişdi. Bu səbəbdən şəbəkə Prezidentin mesajının böyründə müvafiq xəbərdarlıq yerləşdirmişdi. Tvitdə deyilirdi ki, Vaşinqtonda heç zaman etiraz edənlərin “muxtar zonası” olmayacaq.
