Koronavirus, karantin, bağlı sərhədlər və digər məhdudiyyətlər hər şeyə, o cümlədən ölkənin ərzaq bazarına mənfi təsir göstərib.
Müşahidələrə əsasən, karantinin tətbiqi başlayandan, paytaxtdakı supermarket və bazarlarda qida məhsullarının qiymətləri əhəmiyyətli dərəcədə, bəzi hallarda hətta 30-40% artıb.
Xüsusi artım mövsüm meyvə-tərəvəzlərində, ət və süd, eləcə də dənli bitkilər və taxıl məhsullarında müşahidə edilir.
Toyuq ətinin kilosu 3.20 manatdan 4.70 manatadək, mal əti 9 manatdan 15 manatadək, qoyun əti 11.50 manatdan 16 manatadək artıb. Yaz aylarında 7 qəpiyə satılan broyler toyuqlarının yumurtası hazırda 20 qəpiyədir.
COVID-19 infeksiyasının yayılmasının qarşısının alınması üçün dövlət tərəfindən görülən tədbirlər, sərhədlərin bağlanması, rayonlararası gediş-gəlişdə yaranmış çətinliklər istər-istəməz ölkənin ərzaq bazarına və qiymətlərə təsir göstərir. Bu barədə Sputnik Azərbaycan-ın Bakının supermarket və bazarlarında ərzaq məhsullarının qiymətləri ilə bağlı hazırladığı infoqrafikadan daha ətraflı məlumat əldə edə bilərsiniz.
