BAKI, 16 iyun — Sputnik. Azərbaycanda yeganə olaraq, ibtidai sinif müəllimlərinin əvəzçilik qaydasında, ikinci iş yerində işləməsinə icazə verilmir.
Sputnik Azərbaycan xəbər verir ki, bu barədə Təhsil Nazirliyinin İnsan resursları şöbəsinin müdir müavini Murad Camalzadə danışıb.
O bildirib ki, mövcud qaydalara görə, əgər ibtidai sinif müəllimləri bir və ya iki məktəbdə ikinci sinifdə tədris aparacaqlarsa, buna yerli təhsil idarəetmə orqanları razılıq verməlidirlər. Bu kimi hallara ən ekstremal vəziyyətlərdə icazə verilir.
M.Camalzadənin fikrincə, bunun üçün xüsusi tələbat olmalıdır.
"Ancaq hazırda kadr proseslərinin tənzimlənməsi zamanı o qənaətə gəlmək mümkündür ki, ölkənin istənilən bölgəsində məktəbləri ibtidai sinif müəllimləri ilə tam şəkildə təmin edə bilirik. Rus bölməsi istisna olmaqla, Azərbaycan bölməsində ibtidai sinif müəllimi çatışmazlığı yoxdur", - deyə Camalzadə vurğulayıb.
