BAKI, 14 iyun — Sputnik. Böyük Britaniyanın təhsil qurumlarından olan bir qrup alim araşdırma nəticəsində COVID-19-un yeni xəstəliyə səbəb olma riskini aşkar edib. Sputnik Azərbaycan bildirir ki, onların tədqiqatının nəticələri New England Journal of Medicine-də dərc olunub.
Alimlərin ortaya qoyduqları statistikaya görə, əgər xəstədə diabet varsa, o, koronavirusun fəsadlarını ağırlaşdırır. Eyni zamanda COVID-19 əvvəllər diabet xəstəliyi olmayan insanlarda onun yaranma riskini artırır.
Koronavirusun hüceyrələrə daxil olmasına cavabdeh olan ACE-2 zülalı qlükozanın metabolizmini təmin edən orqanlara təsir göstərir.
Tədqiqatçılar əlavə ediblər ki, koronavirusun diabet yaratması sualı hələ tədqiqat mərhələsindədir.
Xatırladaq ki, 2019-cu il dekabrın 31-də Çin hökuməti Uhan şəhərində pnevmoniyanın yayıldığı barədə Ümumdünya Səhiyyə Təşkilatını məlumatlandırıb. Xəstəliyi törədən virusun SARS-CoV-2 yeni tip koronavirus olduğu təsbit olunub.
Martın 11-də ÜST koronavirus epidemiyasını pandemiya elan edib.
