BAKI, 9 may — Sputnik. Amerikanın "Facebook" şirkəti əməkdaşlarına 2020-ci ilin sonunadək evdən işləməyə icazə verəcək.
Sputnik Azərbaycan xəbər verir ki, bu barədə "CNBC" telekanalına şirkətin nümayəndəsi bildirib.
"Öz işini uzaqdan yerinə yetirə bilən istənilən əməkdaşa bunu davam etməyə imkan veriləcək", - məlumatda bildirilir.
Qeyd edilir ki, şirkət iyulun 6-da ofislərinin əksəriyyətini açmağa başlayacaq. Bununla yanaşı, "Facebook" nümayəndəsi deyib ki, ofisdə işə hansı əməkdaşların çıxacağına dair hələ ki, qərar verilməyib.
"Google" şirkətinin də bu cür tədbirlərə əl atacağı bildirilir. Ofisə qayıtması lazım olan əməkdaşlar bunu iyulun əvvəlində edə biləcəklər.
Ümumdünya Səhiyyə Təşkilatı (ÜST) martın 11-də yeni tip koronavirusun (SARS-CoV-2) səbəb olduğu COVID-19 xəstəliyinin yayılmasını pandemiya elan edib. ÜST-ün son məlumatına görə, dünyada artıq 3,6 milyondan çox yoluxma faktı qeydə alınıb, 254 mindən çox insan dünyasını dəyişib.
