39 günlük fasilədən sonra Bakı metrosu fəaliyyətini bərpa elədi. Bu addım ölkədə koronavirus pandemiyası ilə mübarizə məqsədilə qoyulan karantin rejiminin yumşaldılması çərçivəsində atıldı.
Ölkədə hələ də xüsusi karantin rejimi hökm sürdüyündən metropolitenin işi ictimai nəqliyyatda koronavirusun profilaktikası tələblərinə uyğun tənzimlənəcək. Metroya ancaq sms icazəsi, icaze.e-gov.az portalından alınmış xüsusi buraxılış vəsiqəsi, iş vəsiqəsi və ya iş yerindən arayışı olanlar buraxılırlar.
Bundan başqa, hər bir sərnişin tibbi maska taxmalı və sosial məsafəni gözləməlidir. Əgər kiminsə maskası yoxdursa, onu elə metronun girişində ala bilər. Metropoliten işçiləri sərnişinlərin hərarətini də ölçəcəklər.
Sosial məsafənin qorunması üçün Metropolitendə audio, vizual, statik xəbərdarlıq metodlarından istifadə olunur, stansiya və oturacaqlarda məlumatlandırıcı nişanlar qoyulub.
