BAKI, 3 may - Sputnik. Lənkəran rayonun Liman şəhərində yol kənarında yeni doğulmuş körpə aşkar edilib.
Sputnik Azərbaycan “Report”a istinadən bildirir ki, körpəni 1972-ci il təvəllüdlü Camal Mustafa oğlu Kazımov tapıb. O, heyvanları örüşə apardıqdan sonra evə qayıdarkən şəhərin M.Ə.Sabir küçəsində, dəmir yol xəttinin yaxınlığındakı yaşayış olmayan həyətin qarşısında bağlama görüb.
Evdə yaşayış olmadığını bildiyi üçün qapı ağzına qoyulan kağızdan olan qutu onun diqqətini çəkib. Qutunu açanda içərisində qalın örtüyə bələnmiş, yatan körpənin olduğunu görüb.
Körpəni evə gətirib, yuduqdan sonra Daxili İşlər Nazirliyinin “102” zəng xidmətinə məlumat verib. Bundan sonra, körpə polis əməkdaşlarının iştirakı ilə Lənkəran Rayon Mərkəzi Xəstəxanasının doğum şöbəsinə təhvil verilib.
Xəstəxanadan körpənin təxminən bir həftəlik qız uşağı olduğu bildirilir. Həkimin sözlərinə görə, körpənin vizual müayinəsi aparılıb, vəziyyəti orta ağırdır.
Xəstəxanaya daxil olanda temperaturu aşağı olub, bu səbəbdən də küvetə yerləşdirilib. Hazırda temperaturu normallaşıb, qida verilib.
Qeyd olunub ki, hazırda körpənin səhhəti həkimlərin tam nəzarətindədir. İlkin müayinələr zamanı körpədə hər hansı bir travma aşkar edilməyib. Gün ərzində zəruri müayinələrin aparılacağı bildirilir. Faktla bağlı araşdırma aparılır.
