BAKI, 27 aprel – Sputnik. Azərbaycanın Xalq artistləri Aygün Kazımova və Miri Yusif “İcazəli sevgi” adlı yeni dueti təqdim ediblər. Sputnik Azərbaycan xəbər verir ki, bu, ifaçıların üçüncü duetidir. Buna qədər onlar “Petrol” və “Bağışla” mahnılarını ifa ediblər.
Yeni duet kompozisiyasının mahnısının müəllifi Fərid Ağadır. O, Kamal KQB ilə birgə mahnının sözlərini də yazıb. Layihə müğənnilərin uzun illərdir əməkdaşlıq etdikləri SS production şirkətinə məxsusdur. Kazımova və Yusif əmindilər ki, onların bu dueti də əvvəlkilər kimi hitə çevriləcək.
Aygün Kazımova - Azərbaycan pop musiqisinin ən tanınmış müğənnilərindəndir. Onun karyerası "Bakı payızı-88" musiqi festivalında qələbədən sonra başlayıb. Sonra Yurmaladakı və "Asiya Dausı" müsabiqələrində iştirak edib. 1996-cı ildə İstanbulda beynəlxalq müsabiqənin laureatı olub. Müğənni həm Azərbaycanda, həm xaricdə konsertlər verib.
Miri Yusif Azərbaycan musiqisinin tarixində ən populyar qruplardan biri - "Dəyirman"ın keçmiş solistidir. Uzun müddət Amerikada yaşayıb, Bakıya qayıdan kimi solo-karyeraya başlayıb və kifayət qədər uğur qazanıb.
