BAKI, 19 mart — Sputnik. Bütün dünyada yayılan koronavirus təhlükəsi xüsusi rejimdə, qapalı şəraitdə qalan şəxslərlə bağlı olaraq müəyyən narahatlıqlar doğurur. Belə müəssisələrdən biri də həbsxanalardır.
Sputnik Azərbaycan xəbər verir ki, Ədliyyə Nazirliyi yanında İctimai Komitənin üzvü Əliməmməd Nuriyev sosial şəbəkələrdə əsası olmayan bəzi məlumatların yayılmasına münasibət bildirib: "Biz - İctimai Komitənin koordinatoru Səadət Bənənyarlı, üzvləri Əhməd Abbasbəyli və mən müraciətləri nəzərə alaraq bir sıra cəzaçəkmə müəssisələrində və Bakı İstintaq Təcridxanasında (BİT) monitorinq apardıq. Məqsədimiz həbsxanalarda koronavirusa qarşı mübarizə tədbirləri ilə tanış olmaq, məhbuыların həyat və sağlamlıqlarının necə qorunmasını müşahidə etmək idi.
Monitorinq apardığımız 3 cəzaçəkmə müəssisəsində və Bakı İstintaq Təcridxanasında Ümumdünya Səhiyyə Təşkilatının, Nazirlər Kabineti yanında Operativ Qərargahın göstərişlərinə və təlimatlarına əməl olunur. Belə ki, hər müəssisədə operativ qərargah yaradılıb və gündəlik iş planları tərtib olunub. Həbsxanaların girişində yaxın məsafədən temperaturu ölçən termovizorlar quraşdırılıb".
Ə.Nuriyev bildirib ki, həbsxanaya daxil olan hər kəs, rəhbərlik də daxil olmaqla, bütün əməkdaşlar, o cümlədən monitorinq aparmaq üçün gələnlər də müşahidədən keçiblır: "Girişlərdə həmçinin dezinfeksiya məhlullarından istifadə olunması mütləq şərtlərdən bidirir. Bütün əməkdaşlar ciddi şəkildə yoxlanılır, müayinə edilir. Tədbirlər Penitensiar Xidmətin 3500-dən çox əməkdaşını əhatə edir. Hətta BİT-də bu, gündə iki dəfə olaraq həyata keçirilir. Əgər səhhətində hər hansı narahatlığı olan əməkdaş olarsa, o, işə buraxılmır. Eyni zamanda məhbuslar da mütəmadi olaraq müayindən keçirilir, onlara maarifləndirici tövsiyələr verilir".
"Həbsxanalarda olan bütün yeməkxanalarda, yataqxanalarda mütəmadi dezinfeksiya işləri aparılır. Biz monitorinq apararkən də bunun şahidi olduq, xüsusi geyimlərdə olan sanitar işçilər məhbusların istifadəsində olan bütün obyektlərdə dezinfeksiya aparmaqla məşğul idilər. Eyni zamanda məhbusların ərzaqla təminatı da yüksək səviyyədə idi. Gündəlik yeməklərdən məhbusların narazılığı yoxdur. Biz də keyfiyyəti yoxlamaq üçün onlardan daddıq, hər şey normal idi", - deyə o əlavə edib.
Ə.Nuriyevin sözlərinə görə, sanitar qovşaqlar da təlimata uyğun olaraq yuyucu, təmizləyici vasitələrlə tam təmin olunub: "Dükanlar da ərzaqla, müxtəlif gündəlik tələbat malları ilə dolu idi, qiymətləri də üzərinə yazılmışdı. Sosial şəbəkələrdə iddia olunduğu kimi dəyərindən baha qiymətə deyildi. Məhbuslar istədikləri qidanı və lazım olan digər məmulatları normal qiymətə oradan əldə edə bilirlər. Rəhbərlik tərəfindən məhbuslara kütləvi şəkildə bir yerə toplaşmamaları tövsiyə olunur və bunun səbəbləri barədə izahat verilir. Kənardan yemək qəbulu tam dayandırılıb. Həbsxanalara ancaq əməkdaşlar keçə bilirlər. Hətta biz - monitorinq qrupunun üzvləri də istədiyimiz vaxt oraya daxil ola bilmərik.
Beləliklə, məhdudlaşdırıcı tədbirlər məhbusların həyat və sağlamlığının etibarlı şəkildə qorunmasına gətirib çıxarıb. Hətta deyərdim ki, onların təhlükəsizliyi şəhərdə, küçədə, bayırda olan insanlardan daha yaxşı qorunur. Ədliyyə Nazirliyi və Penitensiar Xidmətin rəhbərliyi bu istiqamətdə bütün mümkün tədbirləri həyata keçirir. Biz Monitorinq Qrupu olaraq məhbus yaxınlarını narahat olmamağa çağırırıq".
