Zülfiyyə Quluyeva, Sputnik Azərbaycan
BAKI, 14 mart — Sputnik. Nazirlər Kabineti yanında Operativ Qərargahın 14 mart saat 00:00-dan etibarən ölkə ərazisində bəzi sosial izolyasiya tədbirləri barədə qərarı ictimai nəqliyyatın işində də müəyyən dəyişikliklərə səbəb ola bilər.
Bakı Nəqliyyat Agentliyinin (BNA) mətbuat katibi Mais Ağayev Sputnik Azərbaycan-a açıqlamasında bildirib ki, bununla bağlı BNA da iclas keçiriləcək. Onun sözlərinə görə, iclasın nəticələri ictimaiyyətə açıqlanacaq.
Bakı Metropolitenin mətbuat katibi Bəxtiyar Məmmədov isə bildirib ki, hələlik metroda qatarların hərəkət qrafikində dəyişiklik yoxdur: “Şənbə və bazar günləri qatarlar öz qrafiklərinə uyğun hərəkət edəcəklər. Metronun işində sosial izolyasiya tədbirləri ilə bağlı hər hansı dəyişiklik olarsa, ictimaiyyətə açıqlama veriləcək”.
“Azərbaycan Dəmir Yolları” Qapalı Səhmdar Cəmiyyətinin mətbuat xidmətinin rəhbəri Natəvan Bayramova açıqlamasında bildirib ki, sosial izolyasiya tədbirləri ilə əlaqədar Bakı-Sumqayıt sürət qatarının hərəkət cədvəlində hazırda heç bir dəyişiklik yoxdur. Əgər hər hansı dəyişiklik olarsa, dərhal sərnişinlərə bu barədə məlumat veriləcək.
