Zülfiyyə Quluyeva, Sputnik Azərbaycan
BAKI, 3 mart — Sputnik. "Hazırda Azərbaycanda valideyn himayəsindən məhrum olan 1000-dən çox uşaq var ki, onların da yalnız 40-50-si övladlığa verilmək üçün münasibdir".
Sputnik Azərbaycan xəbər verir ki, bu barədə Əmək və Əhalinin Sosial Müdafiəsi nazirinin müavini Anar Kərimov "Valideyn himayəsindən məhrum olmuş uşaqlar və övladlığagötürmə" altsisteminin təqdimatında çıxışı zamanı deyib.
O bildirib ki, övladlığa götürülmə ilə bağlı edilən müraciətlər daha çox böyük şəhərlərin payına düşür: "Biz düşünürük ki, bu şəhərlərdə valideyn himayəsindən məhrum olan uşaqların sayı daha çoxdur. Faktiki olaraq bu uşaqlar valideynləri tərəfindən atılıblar, amma hazırda onların övladlığa götürülməsi üçün bəzi hüquqi addımlar atılmalıdır. Bu uşaqların övladlığa götürülməsinin mümkün olması üçün sənədlər qaydaya salınmalıdır".
Nazir müavini əlavə edib ki, son illər ərzində ildə 700-800 uşaq övladlığa verilib. Lakin keçən il övladlığa verilmə sistemindəki dəyişiklik və keçid dövrü olduğu üçün bu say azalaraq 140-a enib.
"Ötən il noyabrın 1-dən (ƏƏSMN-də övladlığa götürülmə ilə bağlı altsistem fəaliyyətə başlayıb) bugünə qədər 400-dən artıq vətəndaş övladlığagötürmə ilə bağlı müraciət edib. Azərbaycanda uşaqların övladlığa götürülməsi ilə bağlı müraciətlər daha çox uşaqların qohumları tərəfindən edilir", - deyə nazir müavini vurğulayıb.
