BAKI, 27 fevral — Sputnik. Yunanıstanın Saloniki şəhərində şagirdi yeni tip koronavirusa yoluxmuş məktəb 2 həftəlik bağlanıb.
Sputnik Azərbaycan RİA Novosti-yə istinadən bildirir ki, bunu jurnalistlərə Səhiyyə Nazirliyinin nümayəndəsi Sotiris Tsiodras deyib.
Cümə axşamı Yunanıstanda iki yeni yoluxma faktını təsdiq ediblər, bunlardan biri Salonikidə, o biri Afinadadır. Salonikidə yoluxan uşaq Yunanıstanda koronavirus tutmuş ilk şəxsin, 38 yaşlı qadının oğludur. Qadın İtaliyanın şimalında səfərdə olubmuş.
"İkinci yoluxmaya görə yalnız və yalnız profilaktika məqsədilə Salonikidəki 105 saylı məktəb 14 günlüyə bağlanır", - Tsiodras bildirib.
Bildirilir ki, bazar ertəsi uşaq dərsə getməyib. Çərşənbə axşamı isə məktəblə birlikdə ekskursiyaya yollanıb. Mütəxəssisin fikrincə, bu, yüksək riskli kontakt deyil.
"Buna baxmayaraq, biz profilaktik tədbirlər görürük. Bunu edirik ki, 100% əmin olaq", - o deyib.
Tsiodras hər kəsi sakit olmağa səsləyib.
