BAKI, 23 fevral — Sputnik. İtaliya hökuməti Covid-2019 koronavirusu ilə mübarizədə Çin üsulunu seçib - ayrı-ayrı yaşayış məntəqələrini tamamilə təcrid edirlər.
Sputnik Azərbaycan bildirir ki, bu barədə Corriere della sera yazır.
Hökumətin sərt tədbirlər barədə qərarını Baş nazir Cüzeppe Konte açıqlayıb. Onun sözlərinə görə, məhdudiyyətlər ölkənin şimalındakı 11 kommuna, o cümlədən Milandan 60 km aralıda yerləşən Kodonyo şəhərindəki kəndlərdə tətbiq ediləcək. O kəndlərdə təxminən 50 min adam yaşayır.
Göstərilən ərazilərdə supermarket və restoranlar artıq bağlanıb, Milanda bələdiyyənin ictimai idarələrinin işi dayandırılıb. Sakinlərə yaşadıqları yeri tərk etmək, həmçinin bu məntəqələrə giriş yasaqlanıb. Burada nəzarət-buraxılış postları quraşdırılır.
Covid-2019 İtaliyada Lombardiya və Venetoda yayılmağa başlayıb. Burada 89 yoluxma halı qeydə alınıb, iki nəfər ölüb, bir nəfər tam sağalıb. Dünyada isə bu virusdan ölənlərin sayı 2.3 minə çatıb.
Lombardiya vilayətinin prezidenti Attilio Fontananın SkyTg24 telekanalına verdiyi məlumata görə, İtaliyada koronavirusa yoluxanların sayı artıq 100-ü keçib.
