Eldar Tanrıverdiyev, Sputnik Azərbaycan
BAKI, 21 fevral - Sputnik. Seçki pozuntularına yol verən, səsvermənin nəticələri etibarsız sayılan məntəqə və dairə seçki komissiyalarının üzvləri bir daha komissiya üzvü olmayacaqlar. Onlar məntəqə və dairə seçki komissiyasının üzvü olmaq hüququnu itirdilər.
Sputnik Azərbaycan xəbər verir ki, bunu MSK sədri Məzahir Pənahov komissiyanın iclasında bildirib.
“Onlar daha komissiya üzvü olmayacaqlar. Bundan artıq cəzalandırma olmayacaq. O məntəqələrin və dairə seçki komissiyalarının hamısı buraxılacaq”, – deyə MSK sədri vurğulayıb.
Məzahir Pənahov həmçinin qeyd edib ki, 2019-cu ilin dekabrın 23-də keçirilən bələdiyyə seçkilərində pozuntulara yol verən məntəqə və dairə seçki komissiyaları ona görə buraxılmayıb ki, dərhal parlament seçkiləri təyin edilib və komissiyaları yenidən formalaşdırmaq mümkün olmayıb.
