Zülfiyyə Quluyeva, Sputnik Azərbaycan
BAKI, 20 fevral — Sputnik. Bu gün səhər Bakı Metropolitenin "Neftçilər" və "Qara Qarayev" stansiyalarında yerləşən "BakıKart" ödəmə terminallarının fəaliyyətində fasilə yaranıb. Sputnik Azərbaycan-a Bakı Nəqliyyat Agentliyinin mətbuat katibi Mais Ağayev bildirib ki, buna səbəb terminalların elektrik enerjisinin verilişində müəyyən problemlərin yaranması olub: "Problemin "BakıKart" terminallarından qaynaqlanması barədə yayılan məlumat isə həqiqəti əks etdirmir".
Qeyd edək ki, bu gün səhər saatlarında metronun "20 Yanvar" stansiyasında sıxlıq yaranıb. "Bakı Metropoliteni" Qapalı Səhmdar Cəmiyyəti mətbuat xidmətinin rəhbəri Bəxtiyar Məmmədov bildirib ki, son üç gündə metroda sıxlıq müşahidə edilir. Buna səbəb isə sərnişinlərin sayının artmasıdır. B.Məmmədovun sözlərinə görə, qatarlarda problem yaranmayıb: "Bəzi stansiyalarda sərnişinlər qatarın qapısını saxladığı üçün müəyyən yubanma olur".
