BAKI, 13 yanvar — Sputnik. Azərbaycanın mərhum Xalq artisti Ağaxan Abdullayevin oğlu Hikmət Abdullayev atasının yolu ilə getməyi qərara alıb. O, "Ata" mahnısına çəkdirdiyi ilk klipini təqdim edib.
Müğənninin Sputnik Azərbaycan-a verdiyi məlumata görə, mahnının sözləri və musiqisini özü yazıb, aranjirovkası isə Muxtar Abhüseynova məxsusdur. Klipin rejissoru Vəli Zahirovdur. Abdullayev çoxdan atasına mahnı həsr etmək fikrindəymiş, uzun götür-qoydan sonra nəhayət, arzusunu gerçəkləşdirib.
"Mən kamança ifaçısıyam, amma indi qərara aldım ki, müğənniliyə başlayım, atamın yolunu davam etdirim. O həmişə deyirdi ki, məni müğənni kimi görmək istəyir, mən isə o vaxt musiqiçiliyi seçdim. İndi isə onun da, özümün də arzumuzu gerçəkləşdirdim. Bu mahnı mənim debütümdür, çox istəyirəm ki, o, insanların xatirində qalsın", - Abdullayev qeyd edib.
Ağaxan Abdullayev Azərbaycanın ən məşhur xanəndələrindən olub. O, Asəf Zeynallı adına Bakı Musiqi Məktəbində uzun müddət dərs deyib, Azərbaycan Dövlət Akademik Filarmoniyasının solisti olub.
![Mərhum Xalq artisti Ağaxan Abdullayevin oğlu Hikmət Abdullayevin ilk klipinin təqdimatı Mərhum Xalq artisti Ağaxan Abdullayevin oğlu Hikmət Abdullayevin ilk klipinin təqdimatı - Sputnik Azərbaycan](https://cdnn1.img.sputnik.az/img/42284/47/422844759_0:48:1280:853_600x0_80_0_0_7b6dc29ba4730648238a822cd253acf5.jpg)
![Mərhum Xalq artisti Ağaxan Abdullayevin oğlu Hikmət Abdullayevin ilk klipinin təqdimatı Mərhum Xalq artisti Ağaxan Abdullayevin oğlu Hikmət Abdullayevin ilk klipinin təqdimatı - Sputnik Azərbaycan](https://cdnn1.img.sputnik.az/img/42284/47/422844764_0:0:1281:805_600x0_80_0_0_e503b0fa9614f27a8e234da6c52597d3.jpg)
![Mərhum Xalq artisti Ağaxan Abdullayevin oğlu Hikmət Abdullayevin ilk klipinin təqdimatı Mərhum Xalq artisti Ağaxan Abdullayevin oğlu Hikmət Abdullayevin ilk klipinin təqdimatı - Sputnik Azərbaycan](https://cdnn1.img.sputnik.az/img/42284/47/422844769_0:0:1280:806_600x0_80_0_0_884aa7133ed7cc0492d0823469a72c87.jpg)
Xanəndənin ifa etdiyi xeyli xalq mahnısı, təsniflər, dəstgahlar, zərb-muğamlar Milli Televiziya və Radionun "Qızıl Fond"unda saxlanılır. Xalq artisti adından əlavə, "Şöhrət" ordeni və Heydər Əliyev Fondunun "Qızıl çinar" beynəlxalq mükafatına layiq görülüb. Xanəndə 2016-cı ildə vəfat edib.