Bu göyçaylı qadının adi gününü təsəvvür etməyə çalışın. Hər səhər oyanıb öz üç oğlu üçün yemək hazırlamaq, işə getməzdən öncə evin səliqə-sahmanına fikir vermək, özünü qaydaya salmaq, sonra isə 8-10 saat ərzində beli bükük vəziyyətdə ağır alətlərlə ayaqqabı tikmək və təmir etmək...
Bəli, bütün bunların öhdəsindən bir göyçaylı xanım gəlir. Kütahi Mollayeva 16 ildir ki, pinəçiliklə məşğul olur. Kiçik yaşlarından öz ayaqqabılarını təmir edərək böyüyən Kütahi xanım, daha sonra bu sənətini öz peşəsinə, bir növ “çörək ağacı”na çevirib.
Kütahi Mollayeva peşəsinin sirlərini vaxtilə qayınatasından öyrənib, indi isə onları öz oğullarına ötürməyə çalışır. Emalatxanada sifarişlərin sayı həddən artıq olan günlərdə oğlu Teymur ona kömək edir.
“Elə gün olmur ki, kiminsə ayaqqabısı sökülməsin. Bu, çox yararlı peşə olduğuna görə onu öz övladlarıma da tövsiyə edirəm”, - deyə pinəçi xanım bizimlə bölüşüb.
O, işinə olduqca məsuliyyətlə yanaşır. Gün ərzində 10, bəzən isə 20-yə yaxın sifariş qəbul edir. O, həm köhnə çəkmələrin ömrünü uzadır, həm də sifarişlə yeni ayaqqabı hazırlayır. Tikdiyi ayaqqabılar möhkəmliyi ilə seçilir, buna görə daimi müştərilərinin sayı getdikcə artır.
