İlham Mustafayev, Sputnik Azərbaycan
BAKI, 1 yanvar — Sputnik. Azərbaycan xalqının təfəkküründə qəbiristanlıq daim müqəddəs hesab edilib. Orada dəfn edilənlərin milliyyətindən, dinindən asılı olmayaraq hörmətlə yanaşılıb. Hətta torpaqlarımızın işğal edildiyi, minlərlə vətəndaşımızın şəhid olduğu müharibənin səbəbkarı olan ermənilərin məzarlıqlarının da qorunub saxlanması buna daha bir sübutdur.
Sputnik Azərbaycan xəbər verir ki, bu cür qəbiristanlıqlar Şəmkir rayonu ərazisində də var. Burada ermənilərin XIX əsrdə gələrək məskunlaşdığı Çaykənd və Aşağı Çaykənd (1991-ci ilədək Barsum və Barum) kəndlərində olan erməni qəbiristanlıqları insan amilinin səbəb olduğu heç bir dağıntıya məruz qalmayıb.
Aşağı Çaykənd ərazisində yerləşən qəbristanlığın, eləcə də bəzi məzarların ətrafı dəmir çəpərlərlə əhatə olunub. Bu da onu göstərir ki, burada yaşayanlar nəinki qəbirləri dağıtmayıblar, hətta fürsətcil dəmir oğrularından da qoruyublar. Kənd sakinlərilə söhbətdə onlar ata-baba yurdlarından düşmən aqressiyası nəticəsində qaçqın düşsələr də (burada yaşayan əhali əsasən Ermənistanın Qaraqoyunlu mahalının Çaykənd kəndindən gələnlərdir), bu qəbirlərin onlar üçün düşmən olmadıqlarını deyiblər. Onlar öz qəbiristanlıqları kimi, buraya da mal-heyvan salmadıqlarını bildiriblər.
Sputnik Azərbaycan-a danışan Aşağı Çaykənd bələdiyyə sədri Əli Vəliyev də həqiqətən burada erməni qəbirlərinə heç kimin toxunmadığını təsdiq edib: “Qəbiristanlıq kəndin içində yerləşir. Ətrafı evlərdir. Burada heç kim qəbirlərə düşmən gözüylə baxmır. Yeri gələndə ətrafını təmizləyirlər, mal-heyvan çəpərini uçuranda düzəldirlər. Bəzi qəbirlər var ki, yağış, qar, sel səbəbindən insan təsiri olmadan eroziyaya uğrayıb”, - deyə məlumat verib.
Bu fakt, hətta ən qatı düşməninin belə, məzarlarına toxunmamaq Azərbaycan xalqının tolerantlığının bir daha sübutudur.
Sputnik Azərbaycan Aşağı Çaykənd kəndində olan erməni məzarlığından çəkilən fotoları oxuculara təqdim edir.
