Nigar İsgəndərova, Sputnik Azərbaycan
BAKI, 24 dekabr — Sputnik. Dekabrın 23-də Azərbaycanda 4-cü bələdiyyə seçkiləri keçirildi. Bələdiyyə seçkilərinə namizədlər arasında müğənni Roza Zərgərlinin oğlu Corc Qafarovun da adı olub. Artıq bir çox saytlar Corcun namizədliyini verdiyi 31 saylı Qaraçuxur seçki dairəsindən seçildiyi haqda məlumatlar yayıb.
Sputnik Azərbaycan bu xəbərin nə dərəcədə doğru olub-olmadığını öyrənməyə çalışıb. Corc açıqlamasında hələlik dəqiq məlumat olmadığını bildirib: "6 min 677 səs toplamışam. Amma yekun nəticələr haqda məlumatsızam".
"Əslində, nəticələrin belə olacağını düşünmürdüm. Sadəcə olaraq sənədlərimi toplayaraq namizədliyimi vermişdim. Hazırda da yekun nəticələrlə maraqlanıram", - deyə o əlavə edib.
Qeyd edək ki, 25 yaşlı Corc Qafarov hazırda Azərbaycan Dövlət Akademik Milli Dram Teatrının aktyorudur.
