Tbilisidə etirazçılar Gürcüstan parlamenti ətrafında qum və daşlarla dolu kisələrdən barrikadalar qurublar. Barrikadalar qanunverici orqana aparan yollarda yerləşdirilib.
“Borçalı” Cəmiyyətinin sədri, siyasi şərhçi Zəlimxan Məmmədli Sputnik Azərbaycan-a deyir ki, hazırkı iqtidar hakimiyyətə maksimalist şüarlarla gəlmişdi, amma nə demokratiya, nə cəmiyyətin konsolidasiyası, nə də ayrı-ayrı sahələr üzrə islahatlar istiqamətində hər-hansı pozitiv dəyişiklik edə bildi:
“Müxalifətin təklifləri qəbul edilsə də, reallaşdırılmayıb. Hazırda Gürcüstanda müxalifətin vahid cəbhədə mübarizəsi müşahidə edilir. Keçmiş postsovet məkanında Gürcüstan modelinin iflasa uğramasının qarşısı alınmalıdır”.
Qeyd edək ki, Gürcüstanda etirazlar noyabrın 14-dən etibarən başlayıb. Etirazlara səbəb ölkə parlamentində proporsional seçki sisteminə keçidlə bağlı qanunun qəbul edilməməsidir.
