Rahim Muradov, Sputnik Azərbaycan
BAKI, 3 noyabr – Sputnik. Dünən axşam saatlarında Ələt-Astara magistral yolunun Lənkəran rayonunun Bürcəli kəndi ərazisindən keçən hissəsində yolun sağ tərəfində iri gövdəli palıd ağacının böyük bir budağı güclü küləyə tab gətirməyərək yola aşıb.
Sputnik Azərbaycan-ın verdiyi xəbərə əsasən, ağacın iri budağı yoldan keçən Astara şəhər sakini Rüfət Cavadovun idarə etdiyi “KIA Sportage” markalı minik avtomobilin üzərində düşüb.
Rüfət Cavadovun dediyinə görə, hadisə zamanı 3 nəfər ailə üzvü də avtomobilin içərisində olub: “Birdən-birə ağac üstümüzə düşdü və yarpaqlar ön şüşədə göründü. Bir təhər qaçırmaq istədim, amma ağacın budağı çox yekə olduğundan heç cür alınmadı. Mən başımdan xəsarət almışam, həyat yoldaşım isə yüngül xəsarət alıb. Avtomobilimə təxminən 10 min manata kimi ziyan dəyib”.
Məlumat üçün bildirək ki, hadisə zamanı xəsarət alan R.Cavadov alın nahiyəsinin sıyrılması ilə Lənkəran Mərkəzi Rayon Xəstəxanasına çatdırılıb. Xəstəxanadan bildirilib ki, Rüfət Cavadova tibbi yardım göstərilərilib, yaraları sarılıb və o, evə buraxılıb.
