İradə Cəlilova, Sputnik Azərbaycan
BAKI, 14 oktyabr — Sputnik. Xırdalan şəhərindən Binəqədidə olan mövcud kollektora qədər 1200 mm boru xətləri ilə təzyiqli kanalizasiya xətti çəkilir.
Bu barədə Sputnik Azərbaycan-a Azərsu ASC-nin mətbuat katibi Anar Cəbrayıllı məlumat verib.
"Həmin xəttin uzunluğu 4300 metrə yaxındır. Artıq onun yarıdan çoxunu çəkmişik. Hazırda Bakı – Sumqayıt yolunun kənarına gəlib, çıxmışıq. Orada Azərbaycan Avtomobil Yolları və Dövlət Yol Polisi ilə razılaşdırılmış qrafikə uyğun işləyirik. Son iki gündə əsasən gecə saatlarında əməkdaşlarımız çalışıblar", - deyə Cəbrayıllı bildirib.
Onun sözlərinə görə, əsas işlər şənbə-bazar günlərində edilir ki, avtomobillərin hərəkətinə problemlər yaranmasın. İşlərin 20-25 günə yekunlaşacağı gözlənilir.
