Təsəvvür edin ki, filmlərin, video və onlayn oyunların, animasiyaların, komikslərin, kitabların, nağıl qəhrəmanlarının onlarla parlaq personajı Bakıda bir dam altında toplaşıblar. Heç də təəccüblü deyil ki, "AzeCon 2019" yeddinci kospley festivalı paytaxtdakı İdman Sarayında keçirilib. "Sehirbazlar-Birləşin" devizi altında keçirilən festivalda tamamilə fərqli qəhrəmanları görə bilərsiniz.
Festival zamanı ən yaxşı geyimlər, k-pop stilində rəqslər, habelə əl işləri, kitablar və şirniyyatlardan ibarət bir çox maraqlı stend yarışları təşkil edilib.
Kospley yapon dilindən tərcümədə "kostyum oyunu" deməkdir. Burada hər hansı film, animasiya, on-line oyun, nağıl və s. qəhrəmanlarının kostyumları ilə bəzənən iştirakçılar həmin personajların xarakterik davranışını, nitqini və makiyajını da təkrarlayır. Bu oyun dünyada bir hobbi halına gələrək böyük populyarlıq qazanıb və sürətlə yayılmaqdadır. Hər dəfə illik festivallara minlərlə iştirakçı toplanır.
Kospley festivalları 2014-cü ildən bəri Bakıda, Azerbaijan Anime Convention-in təşkilatçılığı ilə keçirilir, hər il daha çox iştirakçı və tamaşaçı cəlb edir. Festivalda Joker, Star Lord və Catwoman-dan başqa hansı personajların olduğuna və onların nələr etdiyinə Sputnik Azərbaycan-ın hazıladığı fotolentdə baxa bilərsiz.
