BAKI, 4 oktyabr — Sputnik. Azərbaycan-Gürcüstan sərhədində 2 Əlcəzair vətəndaşının dövlət sərhədini pozmasının qarşısı alınıb.
Dövlət Sərhəd Xidmətinin Mətbuat Mərkəzindən Sputnik Azərbaycan-a verilən məlumata görə, oktyabrın 4-də Sərhəd Qoşunlarının "Zaqatala" sərhəd dəstəsinin xidməti ərazisində Qax rayonunun Lələli kəndinin ərazisindəki sərhəd zastavasının xidməti sahəsində Azərbaycandan Gürcüstan istiqamətində dövlət sərhədini pozmağa cəhd edərkən Əlcəzair vətəndaşları 1995-ci il təvəllüdlü Bouremad İshak və 1991-ci il təvəllüdlü Boulekroune Farouq sərhəd pozucusu qismində saxlanılıb.
![Gürcüstanla sərhəddə 2 sərhəd pozucusu saxlanılıb Gürcüstanla sərhəddə 2 sərhəd pozucusu saxlanılıb - Sputnik Azərbaycan](https://cdnn1.img.sputnik.az/img/42193/39/421933983_0:0:960:1280_600x0_80_0_0_6fdaf8ac781efe7634933889d793ff9b.jpg)
Saxlanılan şəxslərin sentyabrın 25-də Türkiyədən İstanbul-Bakı reysi ilə Azərbaycan Respublikasına gəlmələri müəyyən olunub. Araşdırma zamanı Əlcəzair vətəndaşları dövlət sərhədini pozaraq Gürcüstana, oradan isə Türkiyəyə və Avropa ölkələrinə keçmək niyyətində olduqlarını bildiriblər.
Fakt üzrə əməliyyat-istintaq tədbirləri davam etdirilir.