e-AVRO kiber-futbol turniri tarixdə milli komandalar arasında ən böyük turnir olacaq.
Müsabiqənin formatına təsnifat və final mərhələləri daxildir. Təsnifatda 55 milli assosiasiyanın hamısı iştirak edəcək. Final turniri 2020-ci il iyulun 9-dan 10-dək Londonda, AVRO-2020-nin Uemblidə keçiriləcək həlledici oyunundan əvvəl baş tutacaq. e-AVRO-2020-nin qalibləri Avropa çempionatının həlledici oyununun biletlərini, habelə iri pul mükafatı qazanacaqlar.
“Qitə üzrə on milyonlarla insan kiber-futbol oynayır və milli assosiasiyalarımızdan iştirakçılara öz ölkələrinin şərəfini ən yüksək səviyyədə qorumaq imkanını verməkdən məmnunuq”, - UEFA-nın marketinq direktoru Qi-Loran Epsteyn deyib.
“Son bir neçə ildə kiber-futbolun populyarlığının artdığını görürük və e-AVRO-2020 milli səviyyədə yeni və mövcud futbol azarkeşləri ilə təmasımızı təmin edəcək”, - o deyib.
Kim iştirak edə bilər?
Hər bir assosiasiya iki-dörd oyunçudan ibarət milli e-futbol komandası ilə təmsil olunacaq. 2019-cu ilin noyabrından 2020-ci ilin yanvarınadək assosiasiyalar onlayn və ya oflayn olaraq keçiriləcək turnirin əsasında komanda üzvlərini seçəcəklər. Bu turnirlər hər hansı bir assosiasiyanın öz e-futbol komandasının olmadığı təqdirdə keçiriləcək. Sonra isə seçilmiş komanda e-AVRO onlayn seçmə mərhələsində mübarizə apararaq Londonda baş tutacaq final turnirinə keçməyə çalışacaq.
Kiber-futbol turnirində iştirak etmək istəyən hər bir kəs eEURO2020.com saytında ölkəsini seçərək qeydiyyatdan keçə bilər.
Turnirin keçirilmə sxemi necədir?
Təsnifat püşkü 2019-cu ilin dekabrında, bütün milli assosiasiyaların öz komandaları ilə bağlı qərar verməsindən sonra baş tutacaq. Seçmə turnirin hər qrupunun qalibi və ikinci yerləri tutan altı ən yaxşı komanda Londonda final mərhələsinə vəsiqə əldə edəcəklər.
2020-ci ilin yanvarında püşkatma keçiriləcək. Püşkatma iştirakçı komandaları 10 seçmə qrupa böləcək. Görüşlər onlayn rejimdə 2020-ci ilin mart-may aylarında keçiriləcək. Hər komanda qrupdakı hər bir rəqibi ilə iki görüş keçirəcək (təkbətək rejimdə). Hər matçın nəticəsinə görə xallar ümumi hesaba daxil ediləcək.
Daha çox məlumatı eEURO2020.com saytından əldə etmək olar.
